नेपाल योगभूमि, तपोभूमि, देवभूमि, ज्ञानभूमि, बुद्धभूमि, शान्तिभूमि र आध्यात्मिक भूमिको रूपमा अनादिकालदेखि सुपरिचित छ । यसै पवित्र भूमिबाट आदियोगी भगवान् शिवले ध्यान र अध्यात्म दर्शन, महर्षि पतञ्जलिले योग दर्शन एवम् भगवान् गौतम बुद्धले अहिंसा र शान्तिको सन्देश फैलाउनुभयो । यही पावन भूस्वर्ग नै हजारौँ ऋषिमुनिहरूको साधना स्थल रह्यो, जहाँबाट ध्यानयोग, तपस्या र दिव्यज्ञानको ज्योति विश्वभर प्रज्वलित भयो ।

पूर्वीय सभ्यता, वेद, दर्शन र शास्त्रको गर्भगृहका रूपमा नेपालले सम्पूर्ण मानव जातिलाई आध्यात्मिक मार्गदर्शन प्रदान गरेको छ । यहीँबाट आध्यात्मिक ज्ञानको गङ्गा सतत् प्रवाहित भई विश्वभर फैलिइरहेको छ । हाम्रा पूर्वज एवम् युगद्रष्टा महापुरुषहरूले गरेको अध्यात्म, योग र आयुर्वेद अनुसन्धानको फलस्वरूप यहींबाट मानव जीवनलाई सहज बनाउने अनगिन्ती प्रयोगात्मक सूत्रहरू प्रतिपादित भए । यहाँको जल, जङ्गल र जमिनका कण–कणमा आध्यात्मिक ऊर्जा प्रवाहित भएको महसूस गर्न सकिन्छ ।

नेपाल प्राकृतिक सौन्दर्यको धरोहर मात्र नभई यसको सांस्कृतिक र सामाजिक विविधता पनि आदर्श र अनुपम छ । यहाँका मठ–मन्दिर, गुम्बा–विहार, ध्यानकेन्द्रहरूमा हुने साधनाले मानव जीवनलाई खुसी, स्वस्थ्य, शान्ति र परमसन्तुष्टिको अनुभूति गराउँछन् ।

आजको युगमा यो अमूल्य सम्पदालाई संरक्षण र संवर्धन गर्दै आरोग्य पर्यटनलाई प्रवर्धन गर्नु नेपाल, नेपाली एवं समग्र मानव समुदायका लागि अपरिहार्य छ । ‘जीवन विज्ञान धाम’ यसै महान् ध्येयका साथ स्थापित एक अद्वितीय आध्यात्मिक केन्द्र हो । जहाँ ध्यानयोग, ज्ञानयोग, कर्मयोग र भक्तियोगका माध्यमबाट मानिसलाई सुख, शान्ति एवम् समृद्धिले भरिपूर्ण जीवन प्रदान गर्ने लक्ष्यमा कार्य भइरहेको छ ।