वर्तमान युग, विकास र सम्भावनाको युग हो । सूचना, विज्ञान र प्रविधिकोविकासले मानिसका यावत् भौतिक आवश्यकताहरू पूरा गर्न सहज बनेको छ ।यसको विकासका लागि संसारभर थुप्रै संस्थाहरूले खोज र अनुसन्धानका कार्य गरिरहेका छन् । तर मानिस भित्र रहेका असिमित सम्भावनाहरूमा काम गर्ने संस्थाको सङ्ख्या संसारमा निकै कम छ । यही अभावलाई महसुस गरी बि सं २०६६फागुन १८ गते जीवन विज्ञान प्रतिष्ठानको स्थापना भएको हो ।

जीवन भन्नाले मानवभित्र रहेको असिमिति सम्भावनाहरूको नाम हो । भने, विज्ञानको अर्थ प्रयोगात्मक रूपमा हरेक पटक सबैलाई उही परिणाम दिने व्यवहारिक ज्ञान भन्ने बुझिन्छ । तसर्थ जीवन विज्ञानले गर्ने हरेक योग, साधना र मानोवैज्ञानिक सूत्रहरू प्रयोगात्मक रूपले सिद्ध हुन्छन् ।

ब्रह्मलीन बसन्ती गुरुमाको परिकल्पना र अथक परिश्रमबाट स्थापित यस मौलिकअध्यात्मिक प्रतिष्ठानका संस्थापक जीवन विकास विशेषज्ञ श्रद्धेय रमेश गुरुदेव रश्रद्धेय भानु गुरुदेव हुनुहुन्छ ।

सम्पूर्ण मानवभित्र रहेको सम्भावनालाई उजागर गरेर आफूभित्रको जीवन ऊर्जालाई स्वस्थ, सुख, शान्ति, समृद्धि र सर्व कल्याणमा लगाउन गुरुद्वयले प्रत्यक्ष मार्गदर्शन गरिरहनु भएको छ ।

काठमाडौँको चाबहिलमा मुख्य कार्यालय र साधना केन्द्र रहेको गैर नाफामुखी यस प्रतिष्ठानले ऋषि मुनिहरू र बुद्धको तपोभूमि नेपाललाई विश्वमाझ आध्यात्मिक केन्द्रको रूपमा स्थापित गर्ने, राष्ट्रलाई आध्यात्मिक पर्यटनको केन्द्र बनाउँदै समृद्धबनाउने उद्देश्यले कार्य गरिरहेको छ ।

गुरुद्वयको मार्गदर्शनमा देशभर सयौँ प्रयोगशाला र दर्जनौं अनलाइन प्रयोगशालामार्फत संसारका ६५ भन्दा बढी देशका लाखौँ मानिसहरूले आफूलाई स्वस्थ, शान्त, खुसी र समृद्ध बनाउने अभ्यासमा सरिक छन् ।